२०८२ पुष २०, आईतवार ०७:५४
अत्यधिक चिसो, शीतलहर र बाक्लो कुहिरोका कारण तराई–मधेशको जनजीवन कष्टकर बनेको छ । पछिल्ला केही दिनदेखि निरन्तर बढिरहेको जाडोले सर्वसाधारणको दैनिकी प्रभावित बनेको छ भने आर्थिक तथा सामाजिक गतिविधिमा समेत प्रत्यक्ष असर पारेको छ । केही सातादेखि बिहान र साँझको समयमा अत्यधिक चिसो बढ्दा बालबालिका, वृद्धवृद्धा, गर्भवती महिला तथा दीर्घरोगीहरू बढी प्रभावित भएका छन् ।
चिसोका कारण रुघाखोकी, ज्वरो, दम तथा अन्य श्वासप्रश्वाससम्बन्धी समस्या देखिन थालेपछि जनकपुरधामका विभिन्न स्वास्थ्य संस्थामा बिरामीको चाप बढ्दै गएको चिकित्सकहरूले बताउन थालेका छन् । चिसोका कारण विद्यालय जाने विद्यार्थीहरूलाई आवत–जावतमा निकै कठिनाइ भएको छ । केही स्थानीय तहले बालबालिकालाई मध्यनजर गर्दै विद्यालयमा जाडो विदा दिएको छ ।
बिहानको समयमा बाक्लो कुहिरो लाग्ने भएकाले अभिभावकहरू आफ्ना बालबालिकालाई विद्यालय पठाउन हिचकिचाइरहेका छन् । कतिपय विद्यालयमा विद्यार्थीको उपस्थिति घटेको छ भने केही विद्यालयले कक्षा समय समायोजन गर्ने तयार ीसमेत थालेका छन् । त्यस्तै खेतबारीमा काम गर्ने किसान र दैनिक ज्यालादारी मजदुरहरूको दैनिकी झन् कठिन बनेको छ ।
चिसो र कुहिरोका कारण बिहानैदेखि काममा निस्कन नसक्दा मजदुर हरूको आम्दानी प्रभावित भएको छ । मजदुर हरूले काम पाउनै मुस्किल भएको गुनासो गरेका छन् । बाक्लो कुहिरोका कारण जनकपुरधाम हुँदै सञ्चालन हुने सवारी साधनहरूमा समेत समस्या देखिएको छ । दृश्यता कम हुँदा सवारी दुर्घटनाको जोखिम बढेको छ भने लामो दूरीका सवारी साधन ढिलो सञ्चालन हुँदा यात्रुहरूले सास्ती भोग्नुपरेको छ ।
विशेष गरी गरिब तथा विपन्न वर्गका नागरिकहरू चिसोबाट सबैभन्दा बढी प्रभावित भएका छन् । न्यानो लुगा, कम्बल र आगो ताप्ने पर्याप्त व्यवस्था नहुँदा खुला आकाशमुनि बसोबास गर्ने तथा कमजोर आर्थिक अवस्थाका मानिसहरू चिसो सहन बाध्य छन् । स्थानीय बासिन्दाहरूले नगरपालिका तथा सरोकारवाला निकायसँग चिसोबाट बच्न राहत सामग्री वितरण गर्न माग गरेका छन् ।
मौसमविद्हरूका अनुसार आगामी केही दिनसम्म चिसो अझै बढ्ने सम्भावना देखाएको छ । यसैबीच चिकित्सकहरूले चिसोबाट बच्न न्यानो कपडा लगाउन, बिहान साँझ अनावश्यक बाहिर ननिस्कन र बालबालिका तथा वृद्धवृद्धाप्रति विशेष ध्यान दिन सबैलाई आग्रह गरेका छन् ।
